tauN bArU MisI BaRu

Monday, December 15, 2008

Bah… nda berasai neh wai, nyau ka nyingkang masuk taun baru ga kitai. Pejam menchelak, bejegau kulu bejegau kili ari nyau ngalih ga. Kemari nyau tinggal sejarah aja. Pegila datai ngundang. Lusa deh… empai temu nya. Agi bedau kerabur disengkining mata. Kitai mina merambu, petara ngatur semua ya. Amat enda berasai taun 2008 nyau ka ngejang ke belakang. Tinggal berapa ari agi. Sekeda ke gagit benung ngitung ari diatu, nyambut penatai taun 2009.

Kati gaya kita kaban? Udah ready nelentang ke tapak jari nyambut taun baru tu? Nama azam kita wai? Anchau ke tikai bemban. Rintai ke dia juluk ati kita ba taun baru tu ila. Enti bisi chapan… tau kebau dulu. Ya ke enda manah serta enda penting tau teju ketisi dulu. Buai magang ampa ya ke enda guna. Merat ke uyut aja unggal. Beri empa manuk. Anang ngaga pengawa senang tau nyadi tusah.

Taun baru mesti semua baru… misi baru, azam baru ngau penemu baru. Sejarah lama, ngasuh ati tusah meri idup menawa, taun baru tu meh alai kitai ngubat ya. Kapa ka ngenang enti ngasuh ati mawa. Ni alah ketegal ya kitai merinsa. Kapa ka idup beburung ke orang. Kitai bisi petara kediri empu. Gaga aja pengawa ke dikeka kita. Enda ibuh nangi ke orang. Ni alah tagang orang ke ka bejaku. Laban kitai nadai mijai control mulut ya. Ni ko ya meh. Petara bisi ngemata. Nemu nimbang ni ke salah ngau ngena. Kitai bisi langkan kediri, bisi periuk asi kediri, bisi apai indai kediri. Ngati kediri meh kitai wai.

Taja pia ngagai kita ke udah bisi sulu pengubat ati maya sunyi. Ukai reti kita tau ngiga baru ba taun baru. Siku cukup meh akan. Anang tak amuk mata. Teberayan but, madai isi akih. Meda anak orang baka meda anak diri… meda sulu orang baka meda sulu diri ga? Utai ke ka digagai enda datai-datai, utai ke udah dibincing nyau abis teberayan. Hahaha… pedis mat nyau bakanya. Enda patut penemu baru nti bakanya.

Ni kita bala bujang dara? Udah bisi misi kita? Nama target ba taun baru tu? Hahaha…. Bai meh sulu kita dating raun makai angin. Ngena mat nya punggal. Manah endar beserimbai ngau pengada taun baru tu alai kita nangam tali semaya. Sapa-sapa kita ke udah bisi tawing, tau perunding ke meh keni jalai ka niri ke rumah tangga. Ambi apai indai kita betapat beambu isan. Enda rindu kita meda pengawa nya? Nama agi dianti lama-lama. Nangi ke ila nyau jelungan, enda alah nyau pepeli ngapa mata kita.

Bala ke agi sekula… sekula bebendar meh. Enti taun dudi kitai bulih lumur enchit. Nanchang tali perau beari-ari. Taun baru tu nimba ai perau pama meh nti ulih jang. Naka alah meh betarit pending, bepaut patung, besekang ke mata. Agi menchelak agi bebatak munyi ko sekeda. Peda ga, anang belajar sampai gila. Kasih cigu kita nadai orang ka diajar agi. Pelaba ke ni ke alah.

Bala ipar ke benung gawa. Gawa meh ngau memanah. Kira-kira meh apai indai, anak bini di menua. Anang tak bangat rindang nyepi udah bulih duit mayuh. Ingat ke penatai diri. Nadai salah maya pemisi ujung taun tu pulai ke menua nyenguk sida. Enjoy-enjoy ga uchak pemendai diri anang enda ingat. Dapur anang enda nungkun. Dianu tuai burung kita ila.

Ngagai bala bujang pakulawang. Jaga memanah serakup kitai. Kitai ke bujang.. bujang meh. Bala ke bisi sulu ni alah titih kitai. Betawing meh orang, enda kurang ke duduk besendi ba atas tawak dibiau ngena selanjau ijau labang beserimbai ngau pengerami taun baru tu. Ni nya alah tunda… begadai datai meh wat. Kapa ka berumban. Bujang sampai tuai ga kitai enti bangat nadai indu ka kaban. Empai kala urang parai ketegal enda bebini ba dunya tu.

Beserimbai enggau taun baru tu aku ka meri tabi besai ngagai semua kita. Enda tinggal mega selamat ari Krismas ngagai semua kita kaban belayan sukut sakak ke udah bekelala ngau aku. Arap ke petara nyangkung kita belama.