Krismas?

Monday, January 5, 2009

Krismas... Taun baru... Taun tu paling sunyi ba idup aku. Pengerami 2 iti tu nadai reti ba aku ba taun tu. Ketegal aku ke ngintu kediri aja. Cuti sem tu empai lama aku enda pulai ke menua. Kediri aku ba sekula tu. Aku enda nemu nama kebuah ati aku berat amat ka pulai mula ya. Meda cuti mina sebulan lebih, aku ngambi pemutus ka diau ditu aja ngabis ke maya cuti tu. Seninjik ga jam nya bisi AUG (Asean University Games). Lalu aku ngeregister nama diri ngau orang nyadi volunteer. Ngiga duit meh ko jaku ngisi maya cuti. Bisi ga indai ngau apai aku talipaun suba nanya ke kemaya aku pulai. Udah aku madah ke diri enda pulai, dia aku bisi ninga nyawa indai aku berubah mimit. Bisi pengelebu ke dalam amat. Lebu meda anak iya enda ulih ngintu ari besai ngau iya.... Lebu amat ari nyawa ke disada ke ya didinga aku.
Aku nadai... Maja ke penemu diri. Udah besai, enda patut enda ulih jauh ari apai indai ko jaku. Enda lama cuti nya enggai pulai. Enda ngawa ga enti kenya ko indai aku.
Jam beganti jam... Ari beganti ari... Sehari.. Dua hari... 10 hari... Baru aku mula ngasai ke bisi enda lantang dalam ati. Sunyi amat ga asai ya. Aku mula nesal. Nesal ke diri enda pulai. Nesal enda ninga jaku indai aku. Enda betah aku kebatang ya indai. Enda betah seduai apai. Tang aku simpan dalam ati aja enda kala dilua ngena leka jaku ngagai seduai. Minta ampun apai... Minta ampun indai.
24 ari bulan... Pegila hari krismas. Nama meh reti ari besai tu ba aku. Kediri aku aja ditu. Nadai sapa enggau aku ngintu. Ka pulai ngagai madi(igat) aku ba Port Dickson. Teringat ke menyadi aku din pemuas aku dugau-dugau. Begadai aku nyapai talipaun, madah ke diri ka pulai ngagai iya. Iya berasai tekenyit ninga aku ka ngusung ya kin. Ukai tekenyit nama, sebedau tu aku enda kala ngiga ya. 3 taun aku udah diau ba tanah Melaya tu, sekali pen kami seduai enda kala betemu. Agi mit suba ukai main pengerat kaul kami seduai. Udah besai, kami seduai mula renggang. Ketegal laya lama. Ketegal ego aku mega. Aku magang salah... Taja pia ari nyawa iya ke dinga aku dalam talipaun, mimit pen ya nadai ngenang semua nya. Sedia nelentang ke tapak jari nerima penatai aku.
Lemai nya mega, nyau aku ngagai Stesen Pudu Raya. Ka ngembi tiket bas ngagai Port Dickson. Lelengau aku ka betemu ngau menyadi aku, ka betemu ngau anak ya. Lama amat udah enda meda. Datai din, jengau-jengau aku ngiga alai endur nyual tiket bas ngagai PD. Nyin ya ko dalam ati aku... Nyau aku beguai ngelawa. Naka pengelebu ati aku udah betanya ngagai tauke dia. Tiket abis... Asai ke dipandam dada. Nama enda meh asai tu deh. Udah abis runding aku. Nadai daya agi. Lama aku duduk dia, matak seput dalam-dalam. Ngiga runding kini ke ka nyingkang ke kaki tu?
Pulai ngagai UKM baru. Nya aja meh palan endur aku ngenduh. Sebedau pulai aku sempat meli sebotol ai bisa ka dikena aku ngintu malam tu legi. Atai di bilik, aku lalu gali ngetat ke diri. Empai lama udah nya, talipaun aku bemunyi. Menyadi aku call... Nanya udah datai dini aku diatu. Pandak jaku aku. Ninga ya udah meli tilam serta pemakai nyangkung aku ngintu krismas malam tu. Sinu amat ati aku ninga. Nama meh riti semua tu petara? Ampun ke aku igat, enda sunyi... enda aku ngiga d ngelama tu.
Buka aku botol ai beli aku tadi, lalu tuntum aku skali. Lapa deh... Tumu aku tinduk malam nya. Nadai rami... Nadai krismas aku taun tu. **** Pagi nya tumu aku dani. Mandi-mandi lalu begari. Nyau aku nurun ngagai KL baru. Ngagai KL Sentral, ngiga kaunter tiket Air Asia. Nama pengawa aku kia????
"Tiket pergi balik ke Sibu pada 15 Januari, balik KL 6 Febuari" pia ko aku madah ngagai indu Tambi jaga kaunter dia. Bah... Kini ke aku pulai maya nya? Ukai enda maya nya kulih udah mula? Ulih digagalkan terus enti nyema enda atai kelas 3 kali beturut-turut. Nya law ba UKM.
Siti aja jawapan ya. Aku lelengau ke indai ngau apai aku. Aku enda peduli agi. Nadai sapa ulih nagang aku. Dunya aku kediri ari orang. Pengerindu aku jauh nyelai ari orang bukai. Semua ke nyadi udah tu, belakang kira.